PREPARACIÓN

Cortamos a cebola en Brunoise (cadradiños pequenos) e pochámola nunha tixola con tres culleradas de aceite. Cando estea transparente, engadimos os Grelos de Galicia, o xamón serrano picado en anacos e refogamos. Reservamos e prequentamos o forno a 210º con calor arriba e abaixo (soleira e grella).

Agora preparamos un bechamel. Poñemos dúas culleradas de aceite nunha tixola e, cando estea tépedo, engadimos a fariña. Tostámola un pouco e comezamos a botar o leite e a remover cunha varilla ata conseguir un bechamel de textura media (nin moi claro como se fose para bañar uns canelóns, nin moi espeso como se fora para croquetas) e deixamos ferver uns minutos. Botamos o sal e probamos.

Cando teñamos o bechamel, engadímolo á mestura dos Grelos de Galicia co xamón. Cubrimos as vieiras con esta mestura. Botamos por riba un pouquiño de Pan Galego relado e introducímolas no forno a 210º durante dez minutos, calor arriba e abaixo, e dous minutos máis só coa grella.

Listas para comer!